6. Pathian cu Minung Jesuh ah a Hon I Cang

          Jesuh hi Pathian a si kan van ti bak hin, kan chim duh bik mi cu, Pathian cu Minung taksa pu in a ra ti hi a si. Hihi Kan Baibal nih a chim mi cu a si.

(1) “Kan biaknak phung chung I aa thupmi biathli hi zeitluk in dah a ngan ti kha ahohmanh nih an al kho lo: minung pum in a lang I ahmaan tiah Thlarau nih tehte a khan, Vancungmi zong nih an hmuh. Miphun kip sinah a kong cu chim a si, Vawlei cung khuazakip ah mi nih an zumh I vancung ah a kai.”(I Timote 3:16). Zeitin? Zeitikah khan dah hi thil hi a hung um? Jesuh Khrih ah khan a tlamtling dih cang.

(2) Vawlei hi ser a rak si hlanah bia cu a rak um cang; cu Bia cu Pathian sinah a rak um I cu Bia cu Pathian a si.”(RElchap>>>John 1:1-14). Hi Baibal bia hna nih hih Jesuh cu Pathian a sit i a hon fiah I, Pathian cu minung pum in a hung i phuang, a hon i theihter, etc…

          Pathian cu Thlarau a si khah. Thlarau lawng a si liao ah khan minung pum le thisen a nei lo I, minung nih hmuh khawh a si loh. Minung nih hmuh khawh a sinak ding ah le

kan sualnak tampi caah thisen thianghlim a chuahter khawhnak ding ah, minung pum (Titsa) ah a hon I cang a herh. Jesuh hi Pathian dang a si lo I, Pathian …… zong a si lo I, Biakam Hlun Pathian minung pumsa (Titsa) in a hon i thuam deuh bia a si – (I Timote 3:16. Pa a si I, minung sualnak ruangah hi bantuk in a hon um hi a herh ruangah a si. minung nih angki chungnawh kan I eih theu bantuk hin, Pathian nih taksa (mipum) a hon I eih/hruk a si. Kan baibal nih hin Jesuh Khrih hi Biakam Hlun Pathian kha a si ti a chim I, fiangtein amah a hon I phuang/langhter ding le lei le vaan rem tein um (Pehtleihnak tha neih) than ding in taksa (Minung Pumsa) angki fual a hon I eih tu hi a si.

(3) “Cucaah kannih kan biapi cu, Pathian nih mi vialte kha Khrih thawngin hawi ah a ser hna, ti hi a si. Pathian nih an sualnak kha anmah sual phawtnak ding caah cazin chungah a khumhpiak hna lo I kannih cu a hawi I a ser hnanak bia chim kha a kan fial.” (II Korin 5:19)

(4) “Ahohmanh nih Pathian cu an hmu bal lo; sihmanhsehlaw Pathian Fapa bel nih Pathian cu mi kha a hngalhter hna Cu Fapa cu Pathian Fapa ngeihchun, a Pa tang chung I aa pommi kha a si.” (John 1:18)

(5) “Hlan ah cun pathian nih kan pupa hna sin I bia a chim tikah profet kha a rak hman hna I a cheuchum tete le phun dangdang in a chimning cu a rak si.” – “sihmanhsehlaw atu kan chan, chan hmanung bik a simi chan ah hin cun, kan sinah a Fapa in a bia cu a chim. Amah thawng cun Pathian nih van le vawlei vialte kha a ser han I amah cu Pathian nih a donghnak I zeizong vialte uktu ding I a thimmi cu a si.”- “Amah cu Pathian sunparnak in a ceu I Pathian he aa lo taktak,I kha a si; cun van le vawlei kha, thawnnak a ngeimi a bia in a domhtlaih hna. Minung cu an sualnak kha a thianhpiak dih hna hnu in vancung ah khin Lianngan Bik Pathian orhlei kamah a thu.” (Hebru 1:1-3)

(6) Jesuh cu hmuhkhawh lo Pathian bantuk taktak a si.”(II Korin 4:4; Kolose 1:15).

(7) Jesuh cu puanin a taksa a khuh lai I, Tisa in aa khuh mi Pathian a si (Heb 10:20). Amah biachim theithiam dih lo in Abraham nih cun, “Pathian nih a khan te ko lai, ka fapa,” tiah a leh (Gen 22:8). Pathian nih cun raithawinak ding cu aa tumcawp i: “Cucaah Khrih nih vawlei I a rung tum lai ah khan Pathian cu a thawh I, “Raithawinak le pekchanhmi thil cu na duhmi an si lo, Sihmanhsehlaw keimah cah taksa pum khan a ka timhpiak cang.” ti a si khah (Heb 10:5).

(8) Jesuh cu inchungkhar dirhtu a si I (Pa Pathian le Zeizong vialte sertu a si – John 1:3).  A Chungkhar dirh mi ah cun Amah cu Fapa ah a rawn I ser/siam fawn (Heb 3:3-6).

(9) Amah thilsiam hna sinah cun a ra I, A mi thim hna sin ah cun; sihmanhsehlaw, an rak thei lo I, a lawmh zong an rak lawmh loh (John 1:10;11)

A.   Vawlei Ser Hlanah Bia A UM

          Johan cangkhat nih hin Pathian minung pumsa (taksa pum) ah a hon i cangnak cu fiang tein a kan cawnpiak. Vawlei ser a si hlan in Bia a rak um, “Bia” hi Greek hawlh cun “Logos” ti a si I, minung bia hi minung sinin midang a si lo bantukin, Pathian Bia zong hi Pathian sin in pathian dang siloah mi dang zong a si kho fawn loh. Pathian thinlung le Pathian remruatnak le Pathian khuakhannak/ruatmi cu “Bia” (Logos) cu a si. Vawlei ser a si hlan in “Bia” cu Pathian thinlung chungah Pathian sinah cun a um I, “Bia” cu amah Pathian kha a si (John 1:1). Vawlei um hlan pi khan minung I hon I cang kha Pathian thinlung ah cun a rak um diam cang. “Nanmah luatnak man cu a sungmi thi, dotlak lonak zeihmanh a ngei lomi tufa thi bantuk, Khrih thi kha a si.” – “Amah cu Pathian nih vawlei a ser hlan khan a thim cang I nanmah caah hi ni hmanung bik hna caan ah hin a hun langhter.” (I Peter 1:19-20; Relchap. Biathlam 13:8).

          “Logos” hi Greek hmanning ah cun biathli phuangtu, remruattu, hrilhfiahtu siloah, thinlung chung I a um mi vial te phuangtu,  ti a si i. A tawi fiangnak in kan chim ah cun, Johan cangkhatnak “Bia” “Logos” nih hin, vawlei ser a rak si hlan in Pathian thinlung ah a rak um cang ti hi a chim duh bik mi a si. Pathian nih A rak i timhtuahnak vialte cu, a caan a van phak bak ah tuahsernak in a langhter. A rak i timhtuahnak/remruatnak cu Taksa in a thuam i, Jesuh Khrih minung pumsa hmang in a hung tlamtling.

          Implified Bible ah cun Johan 1:1 “Bia cu Amah Pathian bak kha si” tiin a tehling. Flanders le Cresson hna nih cun, “Bia cu Pathian, Amah le amah a hung i langhternak a si an ti ve. Cang 14 nak “Bia cu minungah a cang i kan lakah khua a rung sa. A sunparnak cu kan hun hmuh i vel le biatak in a khat. Cu sunparnak cu Pa nih a Fapa ngeihchunte lawng a pek mi sunparnak phun kha a si.” Cang18 – “Ahohmanh nih Pathian cu an hmu bal lo; sihmanhsehlaw Pathian Fapa bel nih Pathian cu mi kha a hngalhter hna Cu Fapa cu Pathian Fapa ngeihchun, a Pa tang chung I aa pommi kha a si.”

          Greek mifim hna cawnnak (Philosophy) ah cun, Logos nih cun vawlei le vaan i, i hngatmi fimnak hramthok ti a sawh. Johan caan liao ah hin Greek mifim cheukhat hna le Judah Pathian Bia cawnpiak thiam hna cu Greek mi hna ruah ning nih hin a neh tuk hna I, ahleice in Judah mifim Alexandria khua mi Philo nih cun Logos cu Pathian nauta deuh le Pathian changtu, Pathian tatak sin in a hon chuak mi a si ti’n a ruat. Khrihfa kalsual cheukhat hna (Gnosticsm cawnpiaknak a hon chuak thar huapin) hi ruahnak hi an cawnpiaknak ah an hung lak I, Jesuh cu mi nauta dirhmun ah an chiah thai. Hi cawnpiaknak hi a hmanlo ning langter pah in, bia an hman mi hmang piak pah in, Johan nih biatak cawnpiaknak caah a hmang piak ve hna. “Bia” (Logos) cu Pathian nak in a nauta deuh mi a si lo I, Pathian bak kha a si deuh (John 1:1) Bia cu Pathian sin in a hon chuak mi a si lo I, Pathian ah cun vawlei ser hlan in a rak um sa a si.(John 1:1-2). Jesuh Khrih, Pathian Fapa cu, “Bia” cu a si I, taksa pum in a hung lang mi Pathian kha a si. 

          B.   Jesuh Nih Minung Nun A Hmang Thok Bak Khan Pathian A Si Cawlh!

          Pathian cu Jesuh Khrih ah titsa/pumsa in a hon i lang I, a nun zeitik caan liao te ah khan dah, Fapa ah cun Pathian cu a hon um? Baibal nih cun fiang taktak in Jesuh minung ah a hon I cang i nun a hon i thok bak khan Pathian sinak cu tling khitkhet te’n amah ah cun a hon um cawlh ve ti a kan chimh/cawnpiak mi tampi lak in tlawmpal ka van langhter lai.

(1)      Matt 1:23, nih cun hi tihin a chim “ Bawipa nih profet ka in, “Ngaknu cu fa a pawi lai I fapa a hrin lai I a min cu Emmanuel a si lai,” tiah a chimmi a tlin nakhnga caah, hi thil vialte an hung um hi a si. (Emmanuel ti cu Pathian kan sinah a um, tinak a si.). A chuah le cangka in khan “Pathian kan sinah a um” ti a rak si diam cang.

(2)      “Pathian nih a fater cu vaawlei cung I a thlah tikah, “Pathian vancungmi vialte nih amah cu an biak awk a si,” a ti.” (Heb 1:6). Simeon nih khan nausem a si liao khan Khrih a si a rak theih diam cang (Luke 2:26), Anna nih khan nausem a si liao ah khan Israel tlenhtu a sit i kha a rak hmuh ve (Luke 2:38), Mifim pawl zong nih khan Nausem cu “an khuk an I bil I an biak” (Matt 2:11).

(3)      Mikah 5:2, “Sihmanhsehlaw Bethlehem Efrath, nangmah cu Judah ram chungah a hme bik khua hna lakah naa tel ve nain, Nangmah chungin Israel uktu a chuak lai. Amah a hram cu kan hnuleipi caan, a luan cangmi caan chungah khan a um cangmi a si.”

(4)      Luke 1:35 “Vancungmi nih cun Mary sinah, “Thiangthlarau khan a cungah a phan lai I Pathian thawnnak cu na cungah aa fu lai. Hi ruangah hin a thiangmi fa cu Pathian Fapa tiah ti a si lai.” a ti.

Isaiah 7:14 zong nih hin ngaknu thiang chung in a rung chuak ding cu Pathian a si ding kha a rak theih cia cang. Phundang in kan chim ah cun, ngaknu ci ah khan Pathian nih a Pathian sinak mizia ci cu a chiah I, naute a hon chuak ding nunnak a hung nei. Pathian nuncan cu a Pa lei in a chawng colh ve. A nu Mary sin khan minung mizia le nuncang zong a chawng fawn. Jesuh a Pa mizia cu a thang lian pi thluahmah I, caan zeimawzet hnuah Pathian thilti khawhnak ruang ah, Pathian sinak cu a hon thar chuak. Ngaknu thianhlim hrin a si hnuah khan a Pathian sinak cu a hung nei cawlh ve.

Mi cheukhat nih cun a Pathian sinak tlamtling cu Tipil a hung ing khan a hung nei an ti. Asinain, ngaknu thianghlim hrin a si nak Luke 1:35 bia bang khan cubantuk cu a si kho lo. Pathian Mizia le minung mizia cu a pawchung I pawi a si liao ah khan a pahnih in a ngei diam cang. Jesuh Tipil a ing liao I Thlarau Thianghlim thuro bantukin a hung zuang kha Thlarau Thianghlim Tipilnak a co nak a si hrim lo. Jesuh nih cun Pathian sinak tlamtling cu a rak nei diam cang (Kolose 2:9). Tipil a ing liao I thil a hung cang mi kha cu, vawlei ah rian a tuan lai I chiti thuh hmelchunhnak le Tipil petu johan nih a Pathian sinak a theihkhawhnak ding chingchiahnak a si (Johan 1:32-34).