7. Jesuh cu Pa a Si Tiah Kan Bible nih a Kan Cawnpiak

 Jesuh cu Pa a Si Tiah Kan Bible nih a Kan Cawnpiak

Pathian cu pakhat lawng a um i, Pathian cu Pa a si (Mal 2:10). Jesuh cu Pathian a si ve si ah cun, Jesuh cu Pa a si lo kho ve fawn loh. Mi cheukhat nih, Jesuh hi Pathian a si ti cu an zum ko nain, Pa a sinak balte cu an zum kho lo i, cu bantuk mi hna caah cun Jesuh hi Pa a si hrimhrim ti mi Baibal hmang in kan hung chim/hrilhfiah lai. Hi nih hin Jesuh hi Pathian a si ti cu a hung hrilhfiah ko lai. Hi  hrilhfiah nak ah hin Baible cang pa khat-hnih lawng hmanh a zaa kho in ka theih.'

1) Isaiah 9:6, “Kan caah ngakchia pakhat a chuak! Fapa pakhat pek kan si! Amah cu Khuaruahhar Fim Chimtu, A Tthawngmi Pathian, Zungzal Hmunmi Pa, Daihnak Bawi, ti a si lai.” Hikaah, kan hmuh mi cu, “Zungzal Hmunmi Pa,” a ti I, Fapa a hung chuak ding mi rak chimchungmi cu Jesuh hi a si I, cu lawng siloin Pa cu Pakhat lawng a um fawn I, curuangah Jesuh cu Pa a si I, Pathian a si (Mal 2:10; Eph 4:6).Colose 2:9 ah cun“Pathian sining cu tling khitkhet tein Khrih a minung sinak ah khan a um"a ti. Pathian a sinak nih cun Pa a sinak zong a huap chim dih I, curuangah, Jesuh ah cun Pa cu a um ti fiangte in kan hmuh khawh.

2) Baibal cang pahnih ka van tarlangh mi lawng siloin, Amah (Jesuh) hrimhrim zong nih Pa a sinak kha a kan cawn piak. Vawikhat cu Jesuh nih Pa kong a chim liao ah Pharasee mi hna nih an thawh I, “Na Pa cu khuazei ah dah a um?” tiah  an hal, Jesuh nih cun, “ Keimah zong nan ka hngal lo, ka Pa zong nanhngal fawn lo. Keimah kha ka hngal u law cu ka Pa zong cu nan hngalh ko hnga,” tiah a leh hna.” (John 8:19). Jesuh nih cun a thawhthan hna I,
“Cucaah cun pei, nan sualnak chungah nan thi lai, kan ti hna kha a si cu. Cun Keimah cu Keimah Ka Si Ko timi ka si kha nan zumh lo ahcun nan sualnak chungah cun nan thi ko lai,” tiah a ti hna.”(John 8:24; Exodus 3:14). Judah pawl nih cun a sullam an hngal khawh caah, “Annih nih, “Aho ka sin a ti dah cu?” tiah an hal. Jesuh nih cun, “hramthawk tein kan chimh lengmangmi hna kha hen ta.” (Jojn 8:25). Sihmanhsehlaw, Pa kong a chim kha an hngal lo (John 8:27). Phundang in kan chim siah cun, Jesuh nih Amah a sinak le Pa cu Amah a sinak kong hha hrilhfiah a timh peng hna nain cucu an pawm duhlo/an zumh lo ahcun an sualnak chungah cun an thi ko lai,”.

3)  Jesuh nih, “Ka Pa le Kei cu pakhat kan si,” tiah a ti.”(John 10:30). Mi cheukhat nih, Pa pawngkam I um bantuk in chim an I tim theu I, Nupi le Pasal zong pumkhat an si I, mi pahnih aa lungrual mi zong pakhat an si kho ve fawn I, cu ve bantuk cun, Jesuh le Pa hi pumkhat an si an ti theu. Hi hrilhfiah ning nih hin Jesuh nih a chim duh bik mi cu a hrawhhrel piak dih. Kan Baibal chung hmun tampi ah Jesuh cu minung a sinak in Fapa a si I, cu lawng si lo in, Pathian a sinak in cun, Pa a si.

4) Tahchunhnak ah, Jesuh nih John 12:45, chung ah “Keimah a ka hmutu nih keimah a ka thlahtu zong kha a hmuh a si.”a ti I, Ahohmanh nih Jesuh Pathian a sinak a hmuh a si ah cun Pa zong a hmuh a si tinak si.

5)  John 14:7 ah, Jesuh nih a zultu pawl sinah, “Atu cu nan ka hngalh cang caah ka Pa zong kha nan hngalh lai; atu thawk hin nannih nih amah cu nan hngalh cang; nan hmuh cang,” tiah a ti hna.” Hi bia an van theih hin “Philip nih khan, “ Bawipa, na Pa cu kan hmuhsak law cu vial cu kan herhmi a si ko,” tiah a ti.”(John 14:8). Phundang in van chim than usih law, Jesuh nih a Pa cu van hmuhsak hna seh law an lung aa lawm ko hnga. Asinain, Jesuh nih hi ti hin a leh hna. (John 14:9-11) - Cang 9. “Jesuh nih, “Nan sinah saupi ka um ko cang, asinain n aka hngal rih lo maw. Filip? Keimah a ka hmutu paoh nih cun ka Pa kha an hmuh ve ko, cucaah zeicahdah na Pa cu kan hmuhsak, n aka ti?’ Cang10- “Keimah cu ka Pa chungah ka um I ka Pa cu keimah chungah a um khan a zum lo maw, Filip? Nannih kan chimhmi hna bia hi keimah chungin aa thawkmi an si tung lo, ka chung I a ummi ka Pa riantuannak pei an si cu.” Cang11- “Ka Pa chungah ka um I ka Pa cu ka chungah a um kha zum ko u. Cucu nan zumh khawh lo a si le hi thil ka tuahmi hna ruang tal ah hin zum ko u.” Hi baibal cang hi mi pahnih lungrual ten an um ruangah Pumkhat (one) bantukin ruat men khawh a si lo I, cuhnu pin lei I, Biahmun, mi pakhat/pumkhat chimnak kha a si deuh. Jesuh Khrih taksa/titsa ah a hung i cang mi Pa hrimhrim kha a si zia fiangte’n a chim mi cu zei thil dang hmanh a sawh khawh loh. Tuliao mi tampi hna bantuk in, Filip zong nih hin Pa cu hmuh khawh lo Thlarau, minung nih a mah hmuhkawh nak lam um chun cu minung Jesuh Khrih lawng ah hin a si ti a theithiam kho ve lo.

6)  Jesus nih, “ka Pa cu ka chungah a um I kei cu ka Pa chungah a um” a ti (John 10:38).

7) Jesuh nih Vawlei mi vialte Pathian ka si lai tiah Bia a kan kamh. (Revelation 21:6-7).

8) John 14:18 ah, Jesus nih hiti’n a chim, "Nanmahte lawngin kan kaltak hna lai lo; nan sinah ka ra kir tthan lai." NIV ah cun, “I will not leave you comfortless I will come to you” a ti. Comfortless cu Greek biafang orphanos in lakmi/ lehmi a si, Srrong’s Exhaustive Concordance nih a sullam a langhter ning le a faingter ning ah cun lakpiak mi, thihtakmi/ngeihchia lunglen (ngaktah) Pa ngeilo,” ti a si. Cucaah, Phundang in kan chim si ah cun, Jesuh nih, Ngaktah bantuk in kan kaltak hna lai lo, Pa ngeilo bantuk in kan kaltak hna lai lo, nan sin ah ka ra kir than lai/nan sin ah ka ra than lai a ti nak a si.  Jesuh nih Pa sinak in bia a chim I, a zultu pawl kha Pa ngeilo in kan kaltak hna lai lo tiah bia a kamh hna, curuangah, Pentecost ni thok in an sin ah Thlarau in a um pi zungzaal hna (Mark 16:20; Matt 28:20; Lamkaltu 2:47; II Korin 3:17)Jesuh hi Pa a sinak langhter ding in, Bia cuaithlai ding um mi tete van langhter chap hna u sih.

9) Jesuh nih thihnak in nithum chung ah amah le mah kha kaa thawh tthan lai tiah a rak chim. (John 2:19-21), asinain Peter nih, Pathian nih Jesuh cu, thihnak in a thawhter tiah a chim. (Acts 2:24).

10)  Jesuh nih nan sin ah Bawmtu ka ratter lai a ti. (John 16:7), Sihmanhsehlaw, Hi ti hin a chimthan kan chimmi bia nan theihmi hi keimah bia a si lo, a ka thlahtu ka Pa bia asi a ti. (John 14:26).

11)  Pa lawng nih mivialte cu Pathian sin ah a hnuh khawh hna.(John 6:44), sihmanhsehlaw, Jesuh nih mivialte cu ka sin ah ka hnuh dih hna lai, tiah a ti. (John 12:32).

12)  Jesuh nih amah a zummi paohpaoh cu ni hmanung bik ni ah nunnak in a thawh ter hna lai.(John 6:40),  sihmanhsehlaw, Bawipa Pathian nih mithi kha a nunter lai cun a kan thawhter lai(Romans 4:17; I Corinthians 6:14).

13)  Jesuh nih zumtu thlacamnak cuh leh ding in bia a kan kamh(John 14:14), sihmanhsehlaw, Ka Pa nih nan thalcamnak an leh hna lai tiah a ti (John 16:23).

14)  Krih cu a kan thianter tu a si (Ephesians 5:26), sihmanhsehlaw, Pa cu a kan thianter tu a si (Jude 1).

15)  I John 3:1, 5 nih hitihin a tial/chim , Pa nih a kan dawt le amah cu minung sualnak lakpiak awk ah a ra (John 1:29-31).Jesuh nih sinak pahnih a nei ti kan thei si ah cun hi bia vialte hi awltein kan theithiam khawh dih ko. Taksa le Thlarau a si I, Pathian le Minung zong a si fawn. Minung sinak in kan chim si ah cun Minung Fapa a si I, A Pathian sinak in kan chim a si ah cun Pathian Fapa zong a si fawn, taksa in a hung lang mi Pa zong a si fawn.

8. Jesuh Cu Jehovah a si