JESUH MIN IN THLACAM CU ZEIDAH A SI?

By, Ngun Thawng Lian Mualhlun

Jesuh nih “Zeizong vialte ka min in nan hal ahcun ka tuah lai, “Pa sunpar nak fapa thawngin a langh nak hnga ka min in nan hal mi poh ka tuah lai” tiah a ti. (John 14:13-14).

Cun a zultu hna sin ah “zeizongte Pa sinah ka min in nan hal ahcun an pek hna lai” tiah a ti rih. (Jojn 15:16). Cun biatak kan chimh zeizong te Pa kha nan hal ahcun ka min in an pek hna lai”.(John 16:23-24; Eph 5:20). A sinain cucu zeidah a sullam a si?

Ziah a min in kan hal ko tung a kan pe ne lo?

Hihi a sawhsawh in a chim mi a si lo. Nan thlacam a donghnak ah “Jesuh min in thla ka cam” nan ti lai ti nak a si lo, zeiruangah ti ahcun, Jesuh nih zeizong vialte nan hal lai I a donghnak ah “JESUH MIN IN THLA KA CAM” nan ti lai tiah a ti lo.

Jesuh min in thlacam cu a min chim sawhsawh khi a si lo I, a min tthawnnak le a thilti khawh tthawnnak tu kha I lak I hman khi a si. Bible chung ah an thlacam nak pawl kan hmuh mi ah an thlacam donghnak ah Jesuh min in thla ka cam an ti bal lo. (Matt 6:9-13; Lamk 1:24-25; 4:24-30; 7:59; 9:13-14; 10:14; Bia 6:10; 22:20).

Midang min kan hman a si ahcun, cu a sullam cu, a thawnnak, a thilti khawnak kan hman khi a si. Cun Paul nih thlarau thalo a ngeimi pa a rak thianter liao ah Jesuh khrih min a rak hmang. (Lam 16:18). A thianter liao ah hin Jesuh min le a thawnnak a rak hman, a mah thawn nak a hmang lo.

Peter nih kebei pa cu “Nazaret khuami Jesuh min in tho law kal kan ti” tiah a ti I a tho I a kal. (lam 3:6). Jesuh min thawnnak kha Peter nih a hman caah a kal ter, a mah tthawnnak a si lo. Sanhedrin khua ah zultu pawl bia an rak hal hna I, “A HO MIN in dah hihi nan tuah” tiah an rak hal hna. (Lam 6:7). ( a ho min in dah nan tuah an ti hna nak cu, min sawhsawh chim khi si lo in, a ho thawnnak in dah nan tuah ti he aa khat).

Cucaah Jesuh min in thlacam cu a mah thawnnak I lak I thlacam hi a si. Cucu a hramthok ten kan caah rian a tuan micu a si. Mi pakhat min kan hman a si ah cun a mah (a min kan hman mipa) aiawh tu kan si caah, a ziaza a lungput le a muisam zong kan I lak I kan hman awk a si.

Cubantuk cun kan thlacam nak ah Jesuh min kan hman tik ah, a mah nun, a ziaza, a thatnak, a mi ngaihthiam nak hna le a thawnnak hna hi kan I lak awk a si. Kan thlacam a donghnak I JESUH MIN IN THLA KA CAM ti sawhsawh khi Jesuh min in thlacam a si lo.

Jesuh min cu thlacam nak lawng ah hman mi a si lo thlacamnak, khuachia thawlnak le a dangdang hna ah hman ding mi a si. A mah duh ning in kan hal ahcun kan hal mi vialte hi a kan pek dih ko lai. (1John 5:14-15).

KAN THLACAM A DONGHNAK I "JESUH MIN IN THLA KA CAM" TIAH KAN CHAPMI KHI TEH A POI MAW?

Hihi a poi hrimhrim lo,, nain kan telhmi hi a herh tuk hlei lo. Bible chung ah an thlacam nak pawl kan hmuh mi ah an thlacam donghnak ah Jesuh min in thla ka cam an ti bal lo. (Matt 6:9-13; Lamk 1:24-25; 4:24-30; 7:59; 9:13-14; 10:14; Bia 6:10; 22:20).
Kan chim cang bang Jesuh nih ka min in nan hal mi poh kan pek hna lai a ti mi hi, a mah ziaza, midang ngaihthiamnak le midang dawtnak tibantuk kan I lak I thla kan cam ding khi a kan duh piak deuh mi cu a si.

Cucaah Jesuh min in thlacam kan ti mi cu kan thlacam a donghnak I JESUH MIN IN THLA KA CAM tiah kan ti mi khi si lo in, a mah ziaza ngei in Pathian sin ah thla kan cam ding tu hi a kan duh piak mi cu a si.

Zei lungput in dah thla na cam? ti mi ah hin na thlacam mi leh nak cu a um. Cucaah thla kan cam tik ah Jesuh lungput ngei bu tein thla kan cam a herh. Cu ti kan cam a si ah cun a biakam bang kan hal mi poh a kan pek ko lai.

Ziah a biakam bang a min in kan hal ko tung a kan pe ne lo? ti mi cu a min in kan hal lo caah a si kho!!

Ngun Thawng Lian Mualhlun

Kaalawm
Like le share in thazaang pek khawh si.