Duh Dawtnak Tangah, Nihin Mino Ralring/Fimkhur ten Um Kan Herh

Hi vawlei kan khualtlawngnak ah, mi tampi nih, vawleicung “DUHDAWTNAK” hi zeikhidah a si I, zeitindah, Pathian nih a kan ser mi kannun Pardawh hi kan hmang lai ti kan thei tawn lo I, vawlei sual ah kan tlu tawn. Cu bantukin, kan nih, Mino hna nih nunziadawh, lo in kan nung sual nak hnga lo le hi vawleicung sualnak ah kan tluksualnak hnga lo ding caah tiin, hi cathluan te hi ka van com ta. 

Minung le Minung kan I Duhnak ah hin a phunphun a um ti cu chim len hau lo in kan thei dih men ko lai na’n, duhnak ahhin tuliao nungak, tlangval pawl lungthin ah cun taksa nomhnak le hiarnak nih hin tamdeuh in hmunhma a khuar ti u sih law kan chim sual lem lai lo dah ti’ah ka ruah. A hleice in pa ca’h cun ruah lending khi a tlawm deuh men lai. A ruang cu a tuar tu cu nu/nungak an si ruang ah a si. A tam u in kan tuak a si ah cun, Pa nih cun nungak muidawh nawn, pumrua tha, taw`awk tha nawn hna kan hmuh hna bak in anmah ah titsa hiarnak a um lo hmanh ah ruahthannak (“second thought”) kan nei `heu ti sih law, kan palh lem lai lo! Nang zei tin na ruah ve? Cu tik ah kan van hmuh than hna i, kan hmuh tam nawn hnu hna le bong ah cun duhnak nih kan thinlung ah hmunhma a la tuk cang I, kan ruah mi cu, Pu Pa nih pei “Lungtum helh Lawh, Nu helh Lawh” an ti kha ti mi khi a hung um colh. (A sullam cu, ka ngah hrimhrim lai tinak si cu.haaaaa). Cu thok cun helh hram kan van i thok colh hna I, titsa nomh nak lei kan panh pi tawn hna, cu tik ah nungak nih an rak kan eel a si ah cun, a hmasabik ahcun kan thin kan i hung ter, (Si ko lo maw cu, tlangval pawl) a si nain hika zawnte ah hin, kan thin a rak hung kho nemmam loh, a roh  hlan ah kan thin a
dam I, kan duhnak hna kha a zual chin chin tawn.

A si nain, Nungak cheukhat nih cun cucu rak theihthiam lo in vawleicung taksa nomh nak cu, Pa/ “kan tlangval pawl” lunglawmh lo lai phang ah kan rak siang sual theu i, nehhnu ah kanmah “NU” hrang le chungkhat unau hrang ah mit hmanh au ngam lonak ding dirhmun tiang in thil a rak chuak theu. (Tampi kan chim ti lai lo)… Pa nih cun, cucu a sawh sawh ah kan ruat tawn, (a tlangpi thu in, pa nih cun, Pa pei kan si cu, nu hmanh I an ngamh ah ti mi thinlung a um) I, hi zawn te ah hin kan theih ding mi cu, midang tampi thin lung zong ah pa cu dirhmun sang ah dir ter a si tawn.

 Sihmanhsehlaw, nungak fim nih cun, duhnak hi zeidah a si ti kha an theih thiam i, an Pasal an sihlan chung cu zeitluk hmanhin rak duh seh law, 'Neh hnu i mualpho tong nak cun' tiin an rak eel ngam i, an i then hnu hmanh ah, mi pi hmai ah an hmai a hngal thotho. An zahumnak/hmaizahnak cu, zankhat/caankhat nawmhnak men ah an siang lo i, cu nih cun inchingkhar dirhkamh khawh tu ding nupi, nu`ha an sinak a langh ter deuh.

Pa vialte thlum te in a chawnh-biak kho tu pawl hi an zaten tlangvaal duh an si hlei lem loh an ti theu, a si na’n, a tam uu cu (tlangval duh le mi lule deuh) an si ko tiah mi tam u nih ruah an si theu. Tihzah tlak nu nih cun tlangval mithmai hnak in mipi mithmai a zoh thiam i, Mi zei hmai hmanh ah ninghngal lo ten a um nan, Mi zei poh i tongh tham khawh ding cun a um hlei loh. A ho hmanh a chawnh hma sa bal hna lo i, mi zei poh i chawnh-biak ngam ding zong in a um bal fawn loh. A mah a chawnh hmasatu poh nih, “Hi Nu cu nupi ding tlak a si hi teh” an ti zung zaal.

Mirh simsiam ten mi vialte a chawn kho ko nan, Mi zeipoh nih an hnih ter kho fawn lo. Riantuannak ah mi nakin a taw a zaang nan, mi zeipoh nih fial ngam a si bal fawn loh. Mi vialte caah a tuan theu ko nan, mi zeipoh nih an duhpoh in rian an fial ngam fawn loh. Thinsau lungfual te in a um ko nan, ho hmanh nih nautat ngam ding tiang in a um bal fawn lo, a hmuh mi pohpoh nun a chimh in, mi nun ning a cawng bal lo hlei ah, a mah nun tu in mi nih, an i cawngkhawhnak ding in an pawng ah a um deuh. A mui dawhnak, nak in a nun ziazaa dawhnak nih cun mi thinlung a neh I a khoih deuh , a aw-ka nem le dawhnak, le a felnak nih cun mi thinlung a neh i, tlangval a si mi pohpoh nih chawnh-biak ngamlo le thang chiat ngam lo ding tiang in a mah le mah cu mi `ih zah tlak ah aa chuah deuh tawn.

Tlangvaal tampi le holh lei ah a ral a tha mi pawl (Mizo holh van I hlang sih law, “Tongkam thiam pawl”) i, "Na dawh, na fel, kan duh tuk" an ti zong ah, "Bia na thiam tuk" tiin, an thinrunh/thinhung lonak ding le a thangchiat lonak dingah tha te in a chawnh ko nan, a thinlung cu a hlat nak bik ah chiah in, mi rum, milian le mitha fa tengteng ti lem lo in, a mah duh tak-tak tu cu hawl in; a thim deuh hna. Mi tamnak ah/ mihmai ah minung nih an zia an thuh theu ti a theih i, Pasal ding si maw? ti in tlangval ding zong a hawl lo i, Amah sersiamtu Pathian nih a mah hrangah a tha mi a thei-fiang deuh ti theih in Pathian sinah thlacamnak  he a aap tawn. Cutiin a um ruangah Pathian zong nih a thlacamnak theih piak in, thluachuah malza a pek i, vawlei cung i ro`ha le sunglawi ah a can ter i, a hleice in mi vialte zong nih, "A covo ding a co si khi" an ti khawh ding tiang in a zulh mi a ding i, a pasal, chungkhat unau hrang zong ah nupi `ha le mo`ha, nu`ha  bik ah a can ter. Hi bantukin, nungak le tlangval kan i duhnak hi, a hmangzia thiammi maw kan si?/ a thiamlomi dah? ti mi hi, pumpak pakhat ciao in i check than hna u sih law, ralring thiam hna u sih, ti ka duh. Nungak hna nih, Hibantuk Nupi fim hi si I zuam hna u sih law, tlangval hna zong nih, hibantuk in a fim mi NU ah kan nungak/kan far le hi sersiam I zuam hnu u sih ti mi hi, duhsaknak tampi he tlawmpal te ka van com.

N