ELOHIM HRILHFIAH DAL - 1NAK

 ELOHIM HRILHFIAH DAL - 1NAK

Elohim?

Elohim cu Pathian pakhat ah Minung Pathum tinak a si maw?

Bia Domhnak

Biakam Hlun chan i, Israel pawl nih Pathian chimnak caah an rak hman mi ELOHIM ti hi plural form asi i, curuangah Mi tampi nih, Pathian pakhat ah minung pathum chimnak a si an ti theu. Cuticun, Genesis 1:26 Bia ah, Pathian nih thil a ser ning kong he pehtlai in, Pathian nih, “Atu cu minung kan ser cang hna lai; kanmah mui an keng lai i kanmah he kan i lo lai." ati mi kan hmuh i, cun Genesis 11:7 zongah, Babel inn sang a satu pawl thiao hmal nak ding kongah Pathian nih, "pakhat le pakhat an holh an i hngalh khawh nakhnga lo, vung kal u si law an holh kha vung danter dih hna u sih,” tiah ati mi bia kan hmuh than. Hikaah, Pathian aw-kaa "Kanmah mui an keng lai i kanmah he kan i lo lai" ti le "Vungkal u sih law an holh kha vung danter dih hna u sih" ti mi pawl zong hi Pathian pakhat ah minung pathum aa sawm-khawm mi an si tiin Pathian pakhat ah minung pathum a umtuning chimfianhnak ding caah an chim/hmang theu i, fak deuh le thuk deuh in van tuak/ruat lo le zohfelnqzohfelnak nei lo ah cun thil si khawh tak tak mi a lo ngai. Sihmanhsehlaw, fiang tein kan zohfel (study) hmasa hi a biapi tak tak mi a si.

Zeiruangahdah, Plural Form hi Hmang A si?

Elohim ti hi Pathian chimnak caah hmang asi i, a donghnak ah "im" ti hi Hebru holh ah thil pakhat nak tam chimnak (plural form) a si. Hiti asi ruang ah hin Israel pawl Pathian hi Pathian minung pakhat lawng siloin Pathian minung pathum chimnak asi ti lei hawih zong in chimtu le cawnpiaktu an rak um mi zong hi thil si kho ngai a si; aruang cu, plural form cu pei a si fom cu. Sihmanhsehlaw, hi bantuk plural noun in langh fawn i, a sullam umtuning pakhat (singular meaning) si fawn mi hi "intensive plural nouns" an ti i, Hebru pawl nih cun, an thil tih phun maw, an thil uar zawng maw, siloah thil lianngan an ti deuh mi pawl hi a umtuning/sullam pakhat sihmanhsehlaw, an aw chuah ning ah cun pakhat nak tam in an aw an chuah tawn.

Tahchunhnak ah, thil lianngan le an uarphun/cawisang phun thenkhat hna cu: maim (ti/rili), bekhurim (Seino/Mino), samaim (van), panim (hmai), bethulim (ngaknu thianghlim), shenabim (saiho), khaim (nunnak), megurim (umnak hmun) chimnak te hna ah hin a donghnak ah "im" a um dih i, cubantuk thiamthiam in, an thil tih zawng cheukhat hna cu: makheluim (zawtnak), sammim (tlau/tlaunak/thihnak), chimnak zongah "im" kan hmuh fawn.

Cuticun, "elohim: zong "im" tiin a dongh ruangah Pathian cu pakhat nak tam tinak siloin, a lianngannak, thil lianngan tamnawn hmunkhat ah aa funtom mi, a thil ti khawhnak a cak ning, lianngannak (plural of majesty) chimnak caah hmang asi. Pathian hna tinak maw, Pathian pakhat ah minung pathun um (trinity) a tinak lei a si lo.

Ramdang (Mi Phundang) hna Elohim le Yahweh

Israel pawl lawng zong siloin mi dang hna zong nih an pathian cu elohim tiin an ko/kawh ve dih thiam ko i, an pathian ah khan minung pathum a um an ti nak a si hlei lo. Tahchunhnak ah; Khemosh cu Amor/Moab pawl pathian, Hebru holh in cun an elohim a si i (Biaceihtu 11:24), cubantuk thiam thiam in, Baal-berith cu Midian pawl elohim (Biaceihtu 8:23ff), Dagon cu Philistia pawl elohim (Biaceihtu 16:23), Baal-Zebub cu Ekron khua pawl elohim (2 Siangpahrang 1:2), Cun, Nisrok cu Assiria pawl elohim (2 Siangpahrang 19:37).

Sihmanhsehlaw, hi miphun dang pathian pawl hi cu pathian nung an si ve lo i,  Israel pawl Pathian cu Pathian nung a si i, Amah (Yahweh) dah lo Pathian (Elohim) dang neih a siang lo (Exodus 20:3). Genesis 17:8 kan rel ah cun Yahweh nih cun Abraham sinah bia a kamh i, Israel pawl caah, "Kei hi an Pathian ka si lai" a ti i, a Hebru holh in cun, "vehai-i-thi lahem lelohim‟ ti a si i, "ve-hai-i-thi‟ (verb Qal waw consecutive perfect 1st person common singular) ti mi cu ka si lai‟ (I will be) tinak a si i, trinity pawl zumh ning bantuk in Elohim ah minung pathum a um a siah cun, minung ser lai i minung pathum i sawmkawm bantuk in kan ruah bang khan, "kan nih hi an Pathian kan si lai: a ti awk a si nain, cubantuk cun a ti fawn tung lo. Hmun tampi ah Yaweh nih hin Israel pawl sinah an Pathian (Elohim) a sinak fiangtuk in a chim peng i, hikaah Gen. 26:24; Exo. 16:12; Exo. 20:2; Lev. 23:22; 24:22; Num. 10:10; 15:41 etc. Hi ka pawl ah hin Pathian ti a chimnak caah hin Elohim ti lawng te a si.

“Atu cu minung kan ser cang hna lai; kanmah mui an keng lai i kanmah he kan i lo lai." KAN (Let us) timi nih hin minung pathum aa sawm khawm mi a si ti tu pawl nih hin, Exo. 20:3 le Isaiah 44:6 cun a dang pawl hna hi teh zeitindah an ruah hnga? Exo. 20:3 ah Yahweh nih, “Keimah hlei in pathian dang zeihmanh nan bia lai lo," ati i, KJV ah cun, "Thou shalt have no other gods before me‟ ti a si. Let us make a man...” titu nih khan "before us‟ ti loin "before me‟ a ti hi teh. Isaia 44:6 ah, "Israel mi kha a uk i a hupphengtu hna Bawipa, Ralkapbu Bawipa nih hitin a ti: “Keimah cu a hmasa bik le a hmanung bik ka si, Keimah lawnglawng hi Pathian ka si i Keimah (kanmah ati lo hih) chim lo a dang pathian zeihmanh an um lo." ti kan hmuh fawn. Hikaah, kan theih ding mi cu, "KAN" (plural pronoun) tiin hmang hmanh seh law, a sawh duh mi aa timh mi cu mi pakhar thil tuah mi (singular sense) a si. Genesis 1:26 hi, "Literal plural" an ti mi phun a si i, Ancient Near East (Biakam Hlun chan liao Vawlei) ah cun catialtu tampi nih an rak hmang tawn. "Kanmah muisam keng minung ser hna sih" (Let us make)" {Hebru = na-aseh}ti zong hi Hebru pawl hna nih thil an tuah hrim hrim ding mi uangthlar/uangngai in an chim nak (cohortative form = Hebrew idiomatic way of expressing deliberation) le a chimtu lianngannak le thiltikhawhnak (plural of Majesty, royal commands being conveyed) pawl zong a sawh duh mi si. Ezra 4:18-zongah, cu bantuk cu a hmang i, Ezra 4:18 Ca nan kan kuatmi kha ka hmaika ah fiang tein rel a si. ati i, "KAN" titu bawi/siangpahrang nih "Ka sinah" ti hmang lo in "Kan sinah" (Hebrai = selakhtun) a ti nak aruang cu, kha Bawi nih khan a lianngannak kha "singular" lawng siloin "plural" in a langhter ti nak a si.

Oxford Annotated Bible nih a hrilhfiah ve ning ah cun; plural form "Kan" (us, our) timi Gen 1:26; 3:22; 11:7 le hmun dang pawl i kan hmuh mi hi Pathian nih A Vanmi, A pawng i a um mi pawl (divine beings who surround God in his heavenly court) a chawnhnak hna si dawh in a chim ve. Hi zong hi thil si kho ngai cu a si. Aruang cu, I Siangpahrang 22:19; Mathai 26:53; Isaiah 6:8 le a dang pawl kan rel tik ah Pathian nih cun mi le sa (Vanmi) tampi a neih nak kong kan hmuh khawh.

Bia donghnak

Pathian pakhat ah miinung pathum a umtuning chim fianh timhnal ding caah Elohim; plural form bochan i tleihtung ah hmang in chim le phuang hi cawnpiaknak him lo tak tak a si ti kan theih fiang ah a tha. Zeiruangahdah biafang thenkhat plural form in chim theu an si ti te hna, thil tuah tu nih a lianngannak langhternak ah mi pakhat thil tuah lawng si lo in pakhat nak tam nih an tuah bantuk in chim phuang theu dah an si ti hna kan theih cang i, a theih fiang rih lo mi hrilhfiah hi kan cung ah aa hngat mi a si ti theih in, kan si khawh chung in Pathian pakhat, minung pakhat lawng a um ning le cu Pathian pakhat cu minung taksa/titsa nei in vawlei ah a hung tum nak kong te hna hi chim in phuang ciao ding ah hawi dawt kan sawm.

Hika link hi hmet law relchap: >>>Bawi Thutdenh cung i a thumi cu Jesuh a si!