Theme: A liangngan bik mi Laksawng

Text: John 3:16

“Pathian nih vawlei hi a dawt hringhran caah a Fapa ngeihchunte kha a pek, cucaah amah a zummi paoh cu an thi lai lo, zungzal nunnak an ngei lai.”

Biahmaithi

Kan hnu liao ah khan Rom cakuat kan kau i, Paul nih Roman 1:1 ah a chim mi “Khrih Jesuh sal le Pathian nih a Thawngṭha chim awkah a thim i a auhmi lamkaltu keimah Paul nih ca kan kuat hna.” ti mi kan chim.

Paul cu vawlei sinak in mi lianngan, cathiam, tihzahmi tbk a si, sihmanhseh law Jesuh he an i tong hnu ah cun vawlei ah a hlawhtlin nak le a sinak ah i hngatchan ti lo in, Khrih he an i pehtleihnak tukha aa hngatchan i, Jesuh sal a hung si i, thawngtha ruang ah kawh mi a dang te chiah mi a si nak kha kan hmuh.

Thawngtha cu zeidah a si? Ca thiang nih a rak chim bang, Jesuh khrih thawngtha: Jesuh cu kan sual ruang ah a thi, vui a si i nithum hnu ah a tho than. Cu thawng tha cu Christmas Muru cu a si.

John 3:16 “Pathian nih vawlei hi a dawt hringhran caah a Fapa ngeihchunte kha a pek, cucaah amah a zummi paoh cu an thi lai lo, zungzal nunnak an ngei lai.”

Paul nun a rak thleng tu Jesuh bak kha ni hin ah mi sual nangmah le kei mah vawi lei mi vial te caah a lianngan tuk mi lak sawng a kan pek mi cu a si ve. Tu zaan ah hi ka hmun ah pathian thangthat ding in kan rat tik ah hin hi a lianngan tuk mi lak sawng cu kan lawmh ti khi a si chih.

Tu zaan ah hin laksawng lian ngan bik mi Jesuh Khrih kan zoh i, hi Bible caang pakhat te (John 3:16) ah hin thawngtha vial te le Christmas um tu ning/sullam vial te kan hmuh khawh.

John 3:16 - Hi Bible cang hi pakhat hnu pakhat in van zoh hmanh hna usih, a ruang cu hi catlang (sentence) pakhat ah hin thawngtha tak tak le christmas sullam kan hmuh i; Pathian nih a dawt i, Pathian nih a pek, Kan zumh i kan nung fawn.

1. Petu – Pathian dawtnak

“Pathian nih vawlei hi a dawt hringhran caah” John 3:16

A caang aa thok nak hrim hi van zoh u sih law kan ti lo in Pathian tin a thok tik ah, a mah hrim hrim hi dawtnak hram a thok tu cu a si. Dawtnak cu a mah sin in aa thok i, a mah kan ruah lo liao caan zong ah a kan ruat i a mah lei panh in kan kal lo liao caan zong ah kan sin ah a um zung zaal cu cu dawtnak tak tak a si.

Rom 5:8 ah kan hmuh mi cu, “Pathian nih cun zeitluk in dah a kan dawt kha hitihin a langhter: kannih cu misual kan si ko rih lioah hin Khrih cu kan caah a thi.

Hi kaa ah kan hmuh khawh mi cu A dawtnak cu kan mah kan that caah a si lo i, a mah thinlung chuak dawtnak tu a si. Kan dirhmun chiat tuk liao caan zong ah a kan dawt i, kan kekkuai dih liao caan zong ah a kan dawt cun a mah kan herh tuk ti kan i theih lo liao caan zong ah a kan dawt.

#A zawmi a fa he zankhuadei a um ti mi nu pakhat kong kha van ruat hmanh. A fa a him ti a hngalh hlan cu a it duh lo. Asiloah innchungkhar pawcawmnak ca ah tiah a mah aa nuamhsaihnak ding vial te kal tak in suimilam saupi rian a ṭuanmi pa pakhat kha ruathmanh. Cucu minung dawtnak a si, cun a thawng tuk mi a si fawn. Asinain Pathian dawtnak cu cu nak in a thawng deuh rih. A dawtnak cu kan ruah khawhmi vawlei dawtnak vialte nakin a thuk deuh, a kau deuh i, a thawng deuh fawn.

Khah, hi ka hin kan caah thawngtha tak tak cu van zoh hmanh u sih. A dawtnak cu thleidang mi a ngei lo, Johan nih cun, “Pathian nih vaw lei a dawt tuk caah” a ti. Cu nih a langh ter mi cu vaw lei miphun vial te, holh phun kip, mi pumpak vial te, mi rum – sifak, mi cak – mi der, a nai – a hlat, ca thiam – thiam lo, aa dawh - dawh lo mi vial te kha thlei dang nak um lo in a kan dawt dih.

Tu zaan ah hin mi nih philh mi, zei hmanh that hnem nak ngei lo bantuk ah aa ruat mi kan um sual zong ah. Hi pathian dawtnak nih cun ram ri a ngei lo i, a dawtnak chung ah mi zei poh kan i tlum dih ti mi van chim than ka duh.

Cu ruang ah hi hi na thinlung ah chim ka duh, a tu christmas nih hin in theih ter peng seh tiah ka duh mi cu, dawt mi na si, a liam cia caan ah na sining ah zeiban tuk zong va si ko hmanh seh, thil ti sual maw hlawhtling lo nak tbk pathian dawtnak cu na caah a si. A hlawh in va hlawh a hau lo, nangmah le nangmah na thatnak chim a hau lo a co in co ding tu a si.

Hawi dawt hna, dawtnak cu pek nak he a zuul tawn. Dawtnak tak tak cu thuh khawh a si lo. Cu ruangah cun Johan nih “a Fapa ngeih chun te a pek’ tiah a van peh than nak hi a si, Pathian a kan dawtnak kan proof khawh nak cu a fapa jesuh a kan pek nak hin hmuh khawh a si.

2. A thil pek : A fapa

“A Fapa ngeih chun te kha a pek”

U le nau hna hi hi Christmas kan ti langmang mi a MURU cu a si. Pathian nih cun cakuat in a kuat men lo i, Van mi hna zong kha a thlah lo, a fapa bak kha a pek.

Isaiah 9:6 ah kan hmuh mi cu “Kan caah ngakchia pakhat a chuak! Fapa pakhat pek kan si!” a ti.

Pek ti mi te hi van i chingchiah hmanh, Amah pathian dawtnak in Jesuh hi pek kan si. Van thei than rih u sih ti ka duh mi cu, Jesuh hi temporary caah pek mi kan si lo, ram ri nei in pek khi a si lo. Khua caan hawih in tamh mawih phun khi a si lo December thla ah kan chuah i january ah kan fim than mi seasonal decoration a si lo. Jesuh cu nizaan, ni hin le zungzaal in aa khat peng . Khrih a kan pek mi cu a tlau khawh mi a si lo i, a rawk khawh lo, a man zei tik hmanh ah a tlau kho lo mi a si.

Van ruat than hmanh u sih. Christmas ah thil kan i pe mi lak sawng te te khi, Toys a rawk, hnipuan fenh eih an tlek an rop, technology thil pawl khi an outdate. Vawlei ah kan i pek mi thil cu an tlau an rawk a si nain Khrih nih a kan pek mi cu a tlau a rawk a outdate kho lo. Khrih cu a laksawng a pek in a pek zung zaal tu a si (Khamhnak, remnak, lawmhnak, deihnak le zungzaal nun nak) te hna.

Ka pa nih christmas lai ah battery meithal a rak ka cawk piak i, ka rak i lawm tuk nain christmas ni lila ah aa rawk, i ka lawmhnak cu ngeihchiatnak tu ah a cang than. Cu bantuk cun vawlei ah thil kan i pek mi hi cu sau a deih/nguh bal lo, sihmanh seh law jesuh nih a kan pek mi cu a rawk bal lo, a tlau bal fawn lo, a thil ti khawh nak a tlau bal lo.

Toidornak he zetindah hi laksawk hi a hung um van zoh hmanh u sih.

Sui le ngun in sak mi inn ah si lo siangpahrang in zong ah si lo in Cawrawl ei nak in ah a cuak, Puan in an tuam, tukhal hna nih va neih khawh ding in, mi rethei hna caah vaa dor khawh nak. Bawi vial te lak bawi cu mi zei hmanh nih va neih an tih lo nak ding ah toidornak le a niam bik mi dirhmun in a ra. Hi hi thil ti khawh tak tak mi a si, mi vial te nih amah kan dong khawh nak hnga zungzaal caah lak sawng cu a fawi zaang cem ding in pek kan si, Jesuh sin ah rat ding hi mi zei hmanh niam tuk, rethei tuk le a kekkuai tuk mi kan um lo.

Cu ruang ah cun, hi lakzawng hi uar sawh sawh hlah “Ong”, a mah kong kha hla in sa sawh sawh hlah, a mah cu rak dong, rak cohlang. Khrih cu na nunnak, na inn, na thinlung ah sawm. Laksawng cu pek a si ko nain colhlan hrim hrim a hau. A sinain laksawng pohpoh nih man an ngei dih. Cu laksawng cu kan ruah khawh mi leng in a man a fak deuh.

3. Aman: Vailamtahnak (the Cost: the Cross)

Philippians 2:8 chung ah kan hmuh mi cu “Mi toiah aa dor i nawlngaihnak lam kha thih tiangin a zulh vailam cung thihnak kha.”

Caw rawl einak kuang nih vailamtahnak lei ah a hruai i, vailamtahnak nih a lawngmi thlan khur ah a hruai. Christmas cu hrinnak le chuahkehnak kong lawng a si lo khamhnak kong a si.

A man a fak tak tak mi laksawng kha van ruat hmanh,

Mi pakhatkhat nih thil pakhatkhat pek awkah fakpi in an i pekchanh tikah, zeitluk in dah an in dawt ti kha na hngalh. An fale fimcawnnak caah suimilam tam deuh rian a ttuanmi nulepa. A ram caah a nunnak a thapmi ralkap. A man a fakmi laksawng nih dawtnak a thuknak kha a langhter.

Atu cu Khrih raithawinak ah, cu biatak cu thangthat. Jesuh laksawng nih a nunnak a liamter. Amah le amah aa toidor, vancung sunparnak kha a kaltak i kan caah vailam cungah a thi. Cu tluk cun Amah caah man na ngei.

Cu caah cun, a man nih hin zeitluk in dah man na ngei ti mi kha in theih ter than ko seh. Na sung lawi ning hi aw khrih raithawinak he na tlak tuk hi aw. Sual tuah nak he nung ti lo in lawmhnak he nung cang u sih. Teinak he kal lo in lawmhnak he kal u sih. "Man ka ngei lo" ti hlah. Dawtmi ka si ti cang. Philh mi/hlawtmi ka si ti lai ci, kei cu thim mi ka si rak ti cang.

Cu caah cu dawtnak cu zei tin dah lehnak kan tuah lai?.

4. Lehnak: Zumhnak

John 3:16 “Amah a zummi paoh cu an thi lai lo, zungzal nunnak an ngei lai” ti.

Zumhnak cu laksawng a cohlangtu kut aa ongmi/ donh mi he aa lo.

Ephesians 2:8–9 ah cun, Nannih cu vel an ngeih hna caah an khamh hna i khamhnak nan hmuh cu amah nan zumhnak thawngin a si. Khamhnak nan hmuhmi cu nanmah tuahmi a si lo, Pathian laksawng a si.Hi kongah hin nan i porhlawt khawhmi zeihmanh a um lo, zeicahtiah nanmah ṭuannak thawngin nan hmuhmi a si lo.

Laksawng a dong mi nih cun a ong/dawnh a hau. Mi pakhat nih aa tuammi laksawng an in pek, asinain hong lo in na um peng bantuk khin mit thlam van suai hmanh. A khuhnak/tuamnak kha na uar tuk; zeitluk in dah a dawh timi kong na chim, asinain a chunglei na zoh bal lo. Cucu zei he dah aa lo tiah cun “Jesuh kong theih ko nain zum bal lo” cu bantuk cu a si. Zumhnak cu laksawng onnak tuahsernak a si.

Zungzal nunnak cu hlawhmi a si lo, a co in co mi a si. Cu caah rian tuan nak in na hmuh mi a si lo, kan phu lo, na hei zumh i na hmuh sawhsawh mi khi a si. Cu caah cun zumh nak in leh. Na hmailei, na chungkhar, na thinphannak vialte hna kha amah sinah chia ko. Zumhnak nih nifatin tuah ding na thim mi kha sersiam seh. Zumhnak cu caan tawite ca lawng a si lo, zumhnak cu nunning le tuahsernak ah a lang awk a si.

Cucaah tuzan kan chuah tikah hi nih hin kan caah zeidah sullam a ngeih?

Biadonghnak

Christmas cu mei dawh te te kan vang, laksawng kan i pe, a si lo ah phunglam phun in kal pi men mi a si lo. Pathian nih ka fapa hmanh ui lo in kan dawttuk caah kan pek a ti nak khi a si. Vawlei sertu kan pathian nih a rawktuk cang mi vawlei kha a zoh i, “Kan kaltak lai lo, kan kaltak lai lo, lak sawng lak ah a tha bik mi, Ka Fapa kha kan pek lai,” tiah a ti. Paul nih 2 Corin 9:15 ah “Pathian cu chim cawk lo a laksawng ruangah hin lawm ko u sih” a ti. Chim khawh lomi, zeicahtiah bia nih a dawtnak thuknak, a raithawinak lianngannak le a biakamnak sunparnak kha a langhter kho lo.

Na nunnak dihlak a thleng khomi man a ngeimi laksawng pakhat kha na mitthlam ah cuanter hmanh. Na leiba a hlohtu, na hma a damtertu le na hmailei a himtertu laksawng. Cucu Jesuh cu a si. Amah cu caw rawl einak kuang chung i naute sawhsawh a si lo. Amah cu vailam cung Khamhtu, thlan in a tho than mi Bawipa le a ra laimi sunparnak Siangpahrang a si. Cucaah, kan tuah hnga awk ah ka duh mi cu; Hi laksawng hi ong loin chia hlah. Tuzan cu laksawng tuammi kha phoh ta lo in he chuak hlah. Amah cu cohlang. Cun Amah na cohlan hnu ah, a mah kong kha share. Tuzarh ah, chungkhar he nan i pumh tikah maw, riantuan hawi he nan i ton tikah maw, innpa he nan i chawnh tikah, hi laksawng sungbik hi i hrawm uh. Thazaang pe hna, zaangfahnak langhter, ruahchannak chim, cun mi pakhatkhat kha Khrih lei ah hruai. Laksawng nganbik cu thuh awk a si lo; pekchanh ding in timhmi a si cah midang sinah hi kong hi va share ve. Christmas cu puai sawhsawh a si lo, thlennak a si. Pathian dawtnak nih kan vawlei, kan innchungkhar, kan thinlung a luhhnawhmi a si.

Kana khua i ṭhitumnak puai kha ruathmanh. Um cu a lawng, cu tikah Jesuh nih khuaruahhar thil a tuah, ti kha mitsur zu ah a canter. Cu um hna cu khat peng rih ko seh law, a thawnnak caah hmun a um hnga lo. Cu bantuk cun, kan nunnak cu porhlawtnak in a khat cang, mah le mah i bochannak in a khat cang, lungretheihnak in a khat cang ahcun, Jesuh nih a kan thlennak ding hmun kan chiah tak lo. Asinain a lawng in kan rat tikah lawmhnak, ruahchannak le nunnak thar in a kan khahter. Cucaah tuzan cu, kan kaa ah lawmhnak, kan lungthin ah zumhnak, le kan kehlan ah riantuannak he chuak hna u sih: pekmi laksawng nganbik Jesuh Khrih. Amah kha lawmh sawhsawh hlah. Amah caah hmunhma serpiak. Amah kha upat sawhsawh hlah amah nih in thlenter ko seh. Amen!