10. Bawi Thutdenh Cung I A Thu Mi Cu Jesuh Khrih A Si!

          Vancung ah cun bawithutdan pakhat a um i, a cungah cun mi pakhat a thu. Hihi Johan nih, Biathlam 4:2; ah a chim i, “Thlarau nih cun khulrang in a ka tlaih. Cun vancung ah cun bawi thutdan pakhat a ummi a cungah cun mi pakhat a thut kha ka hmuh.” a ti. Bawi thutdenh i a thu mi hi el awk um lo in, Pathian a si a fiang, “Zeiruangah?” Aruang cu, Bawi thutdenh pawng i a um mi saram nung pali hna nih cun amah cu hi ti hin an ti, “A Thiang, A thiang, A thiang Lianngan Bik Bawipa Pathian cu, Amah cu a um cangmi le a um liaomi le a um laimi a si,” an ti.”(Biathlam 4:8). Hihi Biathlam 1:5-18 chimmi he kan van tahchunh siah cun, Jesuh a sinak chimfiangnak le Bawi thutdenh i a thu mi chimfianhnak hi aa khat mi a si ti kan theih kho. “Lianngan Bik Bawipa Pathian nih cun, “Kei cu Alfa le Omega ka si,”a ti, cu Pathian a um liomi le a um cangmi le a um laimi cu, zeizong vialte siangpahrang Bawipa a si”(Biathlam 1:8). 1: 5-7 nih hin 1:8nak bia hi Jesuh hrimhrim a si ti a fiangter. Cun, Cang 11-18 nih hin Jesuh kong lawngte a chim fawn. Cang 11 ah hin Jesuh nih cun, “Alfa le Omega, A hmasabik le a hnunung bik a sit i a hung I lang ter than. Cang -17-18 ah Jesuh nih hiti hin a chim, “Kei cu hmasa bik le hmanung bik kha ka si, kei cu a nungmi kha ka si. Ka rak thi, sihmanhsehlaw zohhmanh, zungzal in zungzal tiang ka nung cang. Thihnak cung le mithikhua cungah nawl ka ngei.” A ti. Biathlam angan (Chapter) hmasa bik thok hin Jesuh sinak kan hmuh i: Bawipa, lianngan bik/cungnung bik, Pathian a um liaomi le a um cangmi le a um laimi a ti mi pawl hna hi Jesuh konglam a sinak bia hna hi, Bawi thutdenh i a thu mi konglam chimnak ah hman a si dih than i, cun Bawi thutdenh i a thu mi hi mi dang si lo in jesuh Khrih hrim hrim hi a si ti a fiang tak tak.

         Bia tlangkawm pah in, van chim than ko u sih law, Biathlam 4:11 nih a kan chimh mi cu, Bawi thutdenh i a thu mi cu zei zong vialte sertu a si i, Jesuh cu Zei zong vialte sertu a sit i kan theih fawn (John 1:3; Kolose 1:16). Culawng siloin, Bawi thutdenh i a thu mi cu Sunparnak, le upatnak le lianngannak hmuh awkah aa tlakmi a si (Biathlam 4:11); cun “An thahmi Tuua kha, Lianngannak le rumnak le fimnak le thawnnak le upatnak le sunparnak le thangthatnak hmuh awkah aa tlak,” an ti.(Biathlam 5:12). Biathlam 20:11-12 ah cun Bawi thutdenh i a thu mi cu Biaceihtu bawi (Judge) a si ti a kan chimh i, Jesuh cu mi vialte caah Biaceihtu a si ti kan theih (John 5:22, 27; Rom 2:16,14:10-11). Cuticun, Biathlam a ngan (Chapter) 4 ah Bawi thutdenh i a thu mi hi Jesuh hrimhrim a si ti kan thei khawh. Biathlam 22:3-4 nih hin Pathian le Tuufa kong a kan chimh i, hi hna nih hin Bawithutdenh pakhat, mui pakhat le min pakhat an chim. Cuticun, Pathian le Tuufa cu mi pakhat, mui pakhat le min pakhat nei Bawithutdenh i a thu mi cu a si. Pathian si fawn Tuufa zong a si mi cu Jesuh Khrih lawng hi a si. Van ram i Pathian kan hmuh khawh ding um chun cu Jesuh lawng hi a si (Biathlam 4:2,8; 1:8; 22:1-4; Kolose 2:9-10).